【透過阿卡西紀錄與前世和解】個案分享

現今都市人好多都患有濕疹問題，睇極醫生都醫唔好，R到損手爛腳，唔知仲以為佢賭輸咗身家R爛腳，今日分享呢個個案C小姐就係由細到大都被受濕疹所困擾，睇咗好多中西醫都根治唔到，食咗藥以為好咗少少，點知一食到有味精食物，啲濕疹又發晒出嚟，C小姐喺無計可施下，唯有求助於【阿卡西紀錄】，睇吓當中可唔可以搵到一啲玄機。
喺幫C小姐開啟阿卡西紀錄嘅時候，收到嘅訊息係話佢嘅濕疹問題係源於前世帶落嚟嘅創傷，經C小姐同意之下，邀請影響到C小姐呢個濕疹問題嘅嗰一世嚟到傾吓偈，探究吓佢發生咗啲咩事。
原來喺C小姐嘅嗰一世，佢係生活喺大約十五世紀嘅法國，當時佢係一個普通人家嘅女孩，喺屋企打理家頭細務，有一日屋企突然著火，大火燒晒整間屋，佢雖然執返條命，但係已經被燒到遍體鱗傷、體無元膚，成條村啲人都當佢係怪物，喺果度佢根本無辦法生活，最後，佢帶住憤恨而跳河自殺。

同C小姐呢個前世溝通後得知，原來C小姐今世嘅濕疹極有可能係來自於佢前世被火燒嘅創傷，前世一直都唔安寧係因為佢唔知道點解會起呢場大火，而啲人又唔體諒佢係咁笑佢欺凌佢，令佢覺得自己毫無價值，呢一世，同生生世世都註定係咁架喇。

處理呢啲個案首先要做嘅係先安撫好前世。於是，透過阿卡西紀錄大師、導師同摯愛的人幫助下，搵出起火原因係當時好流行火燒識得巫術嘅女仔，而C小姐咁啱被趁機搞事份子火燒間屋，就係咁無辜辜被牽連。解讀過程中，同C小姐前世講，啲人欺凌你因為你被火燒後嘅外表，但係你自己要知道，你心底裡係一個善良嘅人，呢一點就已經比佢哋全部人都靚，所以你根本唔需要介意，唔需要放喺心上，你可以繼續以你嘅善心活下去，幫助更多嘅人，咁之後你就唔駛再活喺痛苦之中。

經過一輪勸說與開導，C小姐前世終於放下怨恨。而C小姐亦明白到原來自己今世嘅濕疹問題係源於前世嘅火燒同霸凌，再加上跳河自殺，唔怪之得一濕水就疼痛無比。

神奇嘅事當然唔會立即發生，最重要係C小姐知道箇中原委，佢亦都開始改變佢日常嘅心態，接受與呢啲濕疹共存，比以前更細心呵護自己嘅皮膚，而且唔再嫌棄皮膚因為濕疹搞到一撻撻，仍然覺得自己係靚，係值得被愛，大約一個月後開始，C小姐嘅皮膚慢慢有好轉，配合醫生嘅處方，已經進步到可以濕手洗碗，臉上皮膚亦越嚟越光滑，只係偶爾食過雞煲後仍然會有一兩粒水泡冒起，就當係對自己喺小小懲罰啦！

生理上嘅疾病未必可以經由靈性工具治療，最終都要向專業醫生尋求幫助，但靈性工具絕對可以治癒心靈上嘅創傷，透過喺阿卡西紀錄當中與前世對話，幫C小姐同佢前世解開咗心結，祝福C小姐越嚟越滑，越嚟越索。